₹4.69 લાખથી શરૂ થતી બેસ્ટ ઇલેક્ટ્રિક કાર્સ: BaaS સ્કીમ સાથે મેળવો 449 km ની રેન્જ

Electric Vehicles: જો તમે નવી ઇલેક્ટ્રિક કાર (EV) ખરીદવાનું સપનું જોઈ રહ્યા છો, પરંતુ ઊંચા બજેટના કારણે અટવાઈ રહ્યા છો, તો તમારા માટે એક શાનદાર તક આવી ગઈ છે. હવે 'બેટરી-એઝ-અ-સર્વિસ' (BaaS) એટલે કે બેટરી ભાડા યોજનાને કારણે કારની પ્રારંભિક કિંમતમાં મોટો ઘટાડો થયો છે. આ સ્કીમમાં તમારે કાર ખરીદતી વખતે બેટરીના પૂરા પૈસા ચૂકવવા પડતા નથી. તમે જેટલા કિલોમીટર કાર ચલાવો, તેટલા જ કિલોમીટરનું ભાડું તમારે ચૂકવવાનું રહે છે. ભારતીય બજારમાં હવે માત્ર ₹4.69 લાખની શરૂઆતી કિંમતે જબરદસ્ત ઇલેક્ટ્રિક કાર્સ ઉપલબ્ધ છે, જે તમારા ખિસ્સાને પણ પરવડશે. ચાલો જાણીએ આ બજેટ-ફ્રેન્ડલી કાર્સ વિશેની સંપૂર્ણ માહિતી.

1. ટાટા ટિયાગો EV (Tata Tiago EV): બજેટમાં ફિટ અને ફીચર્સમાં હિટ

જો તમારું બજેટ સીમિત છે, તો આ તહેવારોની સિઝનમાં ટાટા ટિયાગો EV તમારા માટે બેસ્ટ ઓપ્શન સાબિત થઈ શકે છે. BaaS પ્રોગ્રામ હેઠળ આ કારની કિંમત માત્ર ₹4.69 લાખ (એક્સ-શોરૂમ) થી શરૂ થાય છે. આ સાથે તમારે બેટરીના ઉપયોગ માટે પ્રતિ કિલોમીટર માત્ર ₹2.6 નું ભાડું ચૂકવવાનું રહેશે. આ કારને સ્પોર્ટી લુક આપવામાં આવ્યો છે. તેમાં EV-બ્લુ કલરના હાઇલાઇટ્સ છે જે તેને પેટ્રોલ મોડલથી અલગ પાડે છે. કારની અંદર પ્રીમિયમ ડ્યુઅલ-ટોન ઇન્ટિરિયર, 7-ઇંચની ટચસ્ક્રીન ઇન્ફોટેનમેન્ટ સિસ્ટમ, ઓટોમેટિક ક્લાઇમેટ કંટ્રોલ અને હાઇવે ડ્રાઇવિંગ માટે ક્રુઝ કંટ્રોલ જેવા શાનદાર ફીચર્સ મળે છે. આ કારમાં 19.2 kWh અને 24 kWh એમ બે બેટરી પેકના વિકલ્પો મળે છે, જે 74 bhp ની પાવર જનરેટ કરે છે. ફુલ ચાર્જ કરવા પર આ હેચબેક 250 થી 315 કિલોમીટર સુધીની શાનદાર રેન્જ આપે છે. સુરક્ષા માટે ટાટાએ તેમાં 2 એરબેગ્સ, ABS સાથે EBD, ટાયર પ્રેશર મોનિટરિંગ સિસ્ટમ અને રિયર-વ્યૂ કેમેરા આપ્યા છે.

2. MG Windsor EV: લક્ઝરી અને સ્પેસનો અદભુત સંગમ

પરિવાર માટે એક પ્રીમિયમ, શાનદાર લુક અને આરામદાયક કાર શોધી રહેલા લોકો માટે MG ની આ કાર એક ઉત્તમ વિકલ્પ છે. BaaS સ્કીમ સાથે આ કારની શરૂઆતી કિંમત ₹9.99 લાખ (એક્સ-શોરૂમ) રાખવામાં આવી છે અને તેનું પ્રતિ કિલોમીટર બેટરી ભાડું ₹3.99 વસૂલવામાં આવે છે. આ કારનો લુક ખૂબ જ ફ્યુચરિસ્ટિક અને મોંઘો લાગે છે. તેની 'એરોગ્લાઇડ' ડિઝાઇન, ફ્લશ-ફિટ ડોર હેન્ડલ્સ અને મોટી ગ્લાસ રૂફ તેને ખાસ બનાવે છે. અંદરની તરફ 135 ડિગ્રી સુધી રિક્લાઈન થતી 'એરો લાઉન્જ' પાછળની સીટ્સ, 15.6-ઇંચની વિશાળ ટચસ્ક્રીન અને વેન્ટિલેટેડ ફ્રન્ટ સીટ્સ આપવામાં આવી છે. તેમાં 38 kWh ની પ્રિઝમેટિક સેલ બેટરી આપવામાં આવી છે, જે 136 PS પાવર અને 200 Nm ટોર્ક આપે છે. કંપનીના દાવા મુજબ આ કાર સિંગલ ચાર્જમાં 449 કિલોમીટરની શાનદાર રેન્જ આપે છે. સુરક્ષામાં પણ આ કાર પાછળ નથી. તેમાં 6 એરબેગ્સ, ચારેય ટાયરમાં ડિસ્ક બ્રેક, હિલ સ્ટાર્ટ આસિસ્ટ અને સાંકડી ગલીઓ માટે 360-ડિગ્રી કેમેરા હાજર છે.

3. ટાટા પંચ EV (Tata Punch EV): SUV ની મજબૂતી અને શાનદાર ટેકનોલોજી

જે ગ્રાહકોને SUV નો મસ્ક્યુલર અને મજબૂત લુક પસંદ છે, તેમના માટે પંચ EV એક શ્રેષ્ઠ પસંદગી છે. BaaS પ્રોગ્રામ હેઠળ આ માઇક્રો SUV ની શરૂઆતી કિંમત આશરે ₹6.59 લાખ (એક્સ-શોરૂમ) છે. આ પછી તમારે બેટરીના ભાડા પેટે પ્રતિ કિલોમીટર ₹3.30 ચૂકવવાના રહેશે. બોનેટ પર ફૂલ-વિડ્થ LED DRL અને હાઇ ગ્રાઉન્ડ ક્લિયરન્સ તેને રસ્તા પર બોલ્ડ લુક આપે છે. તેનું કેબિન હાઇ-ટેક છે, જેમાં વેન્ટિલેટેડ ફ્રન્ટ સીટ્સ, 10.25-ઇંચ ટચસ્ક્રીન, ડિજિટલ ઇન્સ્ટ્રુમેન્ટ ક્લસ્ટર, ઇલેક્ટ્રિક સનરૂફ અને વાયરલેસ ચાર્જર ઉપલબ્ધ છે. આ કાર 25 kWh અને 35 kWh ના બે અલગ-અલગ બેટરી ઓપ્શનમાં આવે છે, જે વેરિઅન્ટ મુજબ 82 PS થી 122 PS પાવર જનરેટ કરે છે. આ SUV ફૂલ ચાર્જમાં 315 થી 421 કિલોમીટરની રેન્જ આપે છે. સુરક્ષાની બાબતમાં પંચ EV એ અલગ છાપ છોડી છે. આ કારને ક્રેશ ટેસ્ટમાં 5-સ્ટાર સેફ્ટી રેટિંગ મળ્યું છે. તેમાં 6 એરબેગ્સ, ઇલેક્ટ્રોનિક સ્ટેબિલિટી કંટ્રોલ (ESC) અને 360-ડિગ્રી કેમેરા જેવી આધુનિક સુરક્ષા ટેકનોલોજી છે.

આ પણ વાંચોઃ સ્વિફ્ટ પણ પાછળ રહી ગઈ! ₹4.99 લાખની આ મારુતિ કાર પર મળી રહ્યું છે મોટું ડિસ્કાઉન્ટ

આ પણ જુઓ

Watch onYouTube