ઓટો સેક્ટરમાં તેજી: ઓક્ટોબરમાં ટુ-વ્હીલરનું વેચાણ 16.1% વધ્યું, SIAM એ જાહેર કર્યા આંકડા

Automobile Sales: ભારતીય ઓટોમોબાઈલ ઉદ્યોગ માટે ઓક્ટોબર 2026 નો મહિનો ઐતિહાસિક સાબિત થયો છે. તહેવારોની સિઝનમાં લોકોએ વાહનોની જંગી ખરીદી કરી છે, જેના કારણે પેસેન્જર વાહનોના વેચાણમાં અત્યાર સુધીનો સૌથી મોટો ઉછાળો જોવા મળ્યો છે. સોસાયટી ઓફ ઈન્ડિયન ઓટોમોબાઈલ મેન્યુફેક્ચરર્સ (SIAM) દ્વારા શુક્રવારે જાહેર કરવામાં આવેલા તાજેતરના આંકડા મુજબ, ઓક્ટોબરમાં વાહનોના વેચાણે અગાઉના તમામ રેકોર્ડ તોડી નાખ્યા છે. આંકડાઓ પર નજર કરીએ તો, ઓક્ટોબર 2026 માં પેસેન્જર વાહનોનું વેચાણ વાર્ષિક ધોરણે 12.4 ટકાના માતબર વધારા સાથે 5.19 લાખ યુનિટ પર પહોંચી ગયું છે. ગત વર્ષે ઓક્ટોબર 2025 માં આ આંકડો 4.62 લાખ યુનિટ હતો. આ જંગી ઉછાળા સાથે માસિક વેચાણમાં 5 લાખ યુનિટનો આંકડો પાર થવો એ ભારતીય ઓટો સેક્ટર માટે એક મોટી સિદ્ધિ છે.

ટુ-વ્હીલર અને થ્રી-વ્હીલર સેક્ટરમાં જોરદાર તેજી

પેસેન્જર વાહનોની સાથે સાથે ટુ-વ્હીલર એટલે કે દ્વિચક્રી વાહનોની માંગ પણ આસમાને પહોંચી છે. ટુ-વ્હીલરનું કુલ વેચાણ 16.1 ટકા વધીને 25.78 લાખ યુનિટ નોંધાયું છે, જે ગયા વર્ષના સમાન સમયગાળામાં 22.20 લાખ યુનિટ હતું.

જો આપણે સેગમેન્ટ મુજબ વાત કરીએ તો:

સ્કૂટરના વેચાણમાં 31.6 ટકાનો ધરખમ વધારો થયો છે, જે ગયા વર્ષના 8.34 લાખ યુનિટથી વધીને 10.97 લાખ યુનિટ પર પહોંચ્યું છે.

મોટરસાઈકલનું વેચાણ 6.6 ટકાના વધારા સાથે 14.23 લાખ યુનિટ નોંધાયું છે.

થ્રી-વ્હીલર સેક્ટરમાં પણ 25.7 ટકાનો મજબૂત ગ્રોથ જોવા મળ્યો છે. ઓક્ટોબર 2025 માં 82,190 યુનિટની સામે આ વર્ષે 1.03 લાખ થ્રી-વ્હીલર્સ વેચાયા છે.

નિષ્ણાતોનો મત અને માંગ વધવા પાછળનાં કારણો

આ શાનદાર કામગીરી અંગે SIAM ના ડિરેક્ટર જનરલ રાજેશ મેનને જણાવ્યું હતું કે, "ભારતીય ઓટોમોબાઈલ ઉદ્યોગમાં ગ્રાહકોની માંગમાં સતત સુધારો જોવા મળી રહ્યો છે. પેસેન્જર વાહન સેગમેન્ટે માસિક 5 લાખ યુનિટના વેચાણનો સીમાચિહ્નરૂપ આંકડો પાર કરીને ઓક્ટોબરમાં અત્યાર સુધીનું સૌથી મજબૂત પ્રદર્શન આપ્યું છે." તેમણે વધુમાં ઉમેર્યું કે, શહેરી અને ગ્રામીણ બન્ને બજારોમાં સરળતાથી મળતી લોન (ક્રેડિટ ઉપલબ્ધતા) અને જૂના વાહનો બદલીને નવા લેવાની માંગને કારણે ટુ-વ્હીલર માર્કેટને મોટો ફાયદો થયો છે. થ્રી-વ્હીલર્સની વાત કરીએ તો, લાસ્ટ માઈલ કનેક્ટિવિટીની જરૂરિયાત અને ઇલેક્ટ્રિક વાહનોના ઝડપી વિદ્યુતીકરણને કારણે માંગ સકારાત્મક રહી છે.

ઉત્પાદન અને નિકાસમાં પણ ભારતનો ડંકો

વેચાણની સાથે વાહનોના ઉત્પાદન અને નિકાસમાં પણ ભારતે મોટી છલાંગ લગાવી છે. પેસેન્જર વાહનો, ટુ-વ્હીલર્સ, થ્રી-વ્હીલર્સ અને ક્વાડ્રિસાયકલ સહિત કુલ ઓટોમોબાઈલ ઉત્પાદન ઓક્ટોબર 2026 માં 28.64 ટકા વધીને 36.19 લાખ યુનિટ થઈ ગયું છે, જે ઓક્ટોબર 2025 માં 28.13 લાખ યુનિટ હતું.

ભારતીય વાહનોની વિદેશમાં પણ ભારે માંગ રહી છે:

કુલ ઓટોમોબાઈલ નિકાસ 26.06 ટકા વધીને 6.82 લાખ યુનિટ થઈ છે (ગત વર્ષે 5.41 લાખ યુનિટ હતી).

ટુ-વ્હીલરની નિકાસમાં 26.48 ટકાનો વધારો જોવા મળ્યો છે (5.44 લાખ યુનિટ).

થ્રી-વ્હીલરની નિકાસમાં 26.69 ટકાનો વધારો થયો છે (53,039 યુનિટ).

સૌથી વધુ આકર્ષણ સ્કૂટરની નિકાસમાં જોવા મળ્યું છે, જેમાં 80.42 ટકાનો જંગી ઉછાળો આવ્યો છે (47,274 યુનિટથી વધીને સીધા 85,292 યુનિટ).

પેસેન્જર વાહનોની નિકાસ પણ 21.79 ટકા વધીને 83,716 યુનિટ નોંધાઈ છે (જે અગાઉ 68,738 યુનિટ હતી).

આ પણ વાંચોઃ ₹4.69 લાખથી શરૂ થતી બેસ્ટ ઇલેક્ટ્રિક કાર્સ: BaaS સ્કીમ સાથે મેળવો 449 km ની રેન્જ

આ પણ જુઓ

Watch onYouTube