Crystal Crop Protection IPO: કૃષિ પાક માટેનાં સોલ્યુશન્સ આપતી કંપનીનો 18 નવેમ્બરે ખુલશે ઇશ્યૂ

Crystal Crop Protection IPO: કૃષિ ક્ષેત્ર સાથે જોડાયેલી વધુ એક કંપની શેરબજારમાં પ્રવેશવાની તૈયારીમાં છે. બીજ અને પાક સુરક્ષા ઉત્પાદનોનો વ્યવસાય કરતી Crystal Crop Protection Limitedનો ₹455.48 કરોડનો IPO 18 નવેમ્બરે ખુલશે અને 20 નવેમ્બરે બંધ થશે. કંપનીએ પ્રતિ શેર ₹259થી ₹272નો પ્રાઇસ બેન્ડ નક્કી કર્યો છે. એન્કર રોકાણકારો માટે બિડિંગ 17 નવેમ્બરે યોજાશે. આ જાહેર ભરણામાં ₹354.77 કરોડના નવા શેર જારી કરવામાં આવશે, જ્યારે પ્રમોટર અંકુર અગ્રવાલ દ્વારા ₹100.71 કરોડના શેરનું ઑફર ફોર સેલ (OFS) કરવામાં આવશે. એટલે કે, ઇશ્યૂમાં કંપની દ્વારા નવા શેરનું વેચાણ અને પ્રમોટર દ્વારા પોતાના હિસ્સાના શેરનું વેચાણ એમ બંનેનો સમાવેશ થાય છે.

કંપની ભંડોળનો ક્યાં ઉપયોગ કરશે?

નવા શેરના વેચાણથી મળતી ચોખ્ખી રકમનો ઉપયોગ કંપની અને તેની મહત્વપૂર્ણ પેટાકંપની Saffire Crop Science Private Limited દ્વારા લેવામાં આવેલા ચોક્કસ ઉધારની ચુકવણી અથવા સમય પહેલાં ચુકવણી માટે કરવામાં આવશે. આ ઉપરાંત, ભંડોળનો ઉપયોગ હજુ ઓળખ નક્કી ન થયેલી કંપનીઓના અધિગ્રહણ દ્વારા વ્યવસાય વિસ્તારવા, વ્યૂહાત્મક પહેલને આગળ વધારવા, સામાન્ય કોર્પોરેટ જરૂરિયાતો પૂરી કરવા વપરાશે. કંપનીના જણાવ્યા અનુસાર, શેરબજારમાં લિસ્ટિંગથી તેને હાલના અને સંભવિત ગ્રાહકો વચ્ચે ઓળખ તથા બ્રાન્ડની મજબૂતી વધારવામાં મદદ મળવાની અપેક્ષા છે. સાથે જ ભારતમાં તેના ઇક્વિટી શેરના જાહેર ખરીદ-વેચાણ માટે બજાર ઊભું થશે.

લોટ સાઇઝ અને રોકાણકારો માટે અનામત હિસ્સો

IPOમાં એક લોટમાં 55 શેર રાખવામાં આવ્યા છે. રોકાણકારો ત્યારબાદ 55 શેરના ગુણાંકમાં અરજી કરી શકશે. નેટ ઑફરનો અડધો, એટલે કે 50% હિસ્સો ક્વોલિફાઇડ ઇન્સ્ટિટ્યૂશનલ બાયર્સ (QIB) માટે અનામત છે. સંસ્થાકીય રોકાણકારો (QIB) 50%, રિટેલ રોકાણકારો 35%, બિનસંસ્થાકીય રોકાણકારો (NII) 15% છે. કંપનીના શેરનું લિસ્ટિંગ નેશનલ સ્ટોક એક્સચેન્જ (NSE) અને BSE પર કરવામાં આવશે.

Crystal Crop Protectionનો વ્યવસાય

વર્ષ 1994માં સ્થપાયેલી Crystal Crop Protection પાક સંબંધિત સોલ્યુશન્સ આપતી કંપની છે. તેના વ્યવસાયના કેન્દ્રમાં બીજ અને કૃષિ રસાયણો છે. કંપનીનો વૈવિધ્યસભર પોર્ટફોલિયો મુખ્યત્વે પાક સુરક્ષા ઉત્પાદનો અને બીજ એમ બે ક્ષેત્રોમાં વહેંચાયેલો છે.

પાક સુરક્ષા ઉત્પાદનોમાં નીંદણનાશક, જંતુનાશક અને ફૂગનાશકનો સમાવેશ થાય છે. કંપની કુદરતી પાક સોલ્યુશન્સ પણ આપે છે, જેમાં જૈવિક પાક રક્ષક ઉત્પાદનો, છોડની વૃદ્ધિ અને ક્ષમતાને પ્રોત્સાહન આપતા બાયો-સ્ટિમ્યુલન્ટ્સ, પ્રવાહી ખાતર, છોડના વૃદ્ધિ નિયામકો અને સૂક્ષ્મ પોષક તત્ત્વો સામેલ છે.

બીજના વ્યવસાયમાં કંપની ખેતપાકો, શાકભાજીના પાકો અને ફૂલોના બીજ પૂરાં પાડે છે. આ રીતે કંપનીનો વ્યવસાય પાકની શરૂઆત માટે જરૂરી બીજથી લઈને તેની સુરક્ષા અને વૃદ્ધિ માટેનાં ઉત્પાદનો સુધી વિસ્તરેલો છે.

આ પણ વાંચો: વિક્રમ સંવત 2082માં કુલ 129 IPOઓએ ₹2.12 લાખ કરોડથી વધુ રકમ એકત્રિત કરી ઇતિહાસ સર્જયો

આ પણ જુઓ:

Watch onYouTube