અમેરિકા-ઇરાન શાંતિ મંત્રણાના પગલે બ્રેન્ટ ક્રૂડ ઓઇલ 98 ડોલર પર ઊંચામાં ખૂલ્યા પછી ઘટીને 97 ડોલરે પહોંચ્યું

ક્રૂડ ઓઇલમાં ઘટાડા પાછળ અમેરિકા-ઇરાન વચ્ચે યુદ્ધવિરામ થવાની પ્રબળ સંભાવના માનવામાં આવે છે. અમેરિકન પ્રમુખ ટ્રમ્પે જણાવ્યું હતું કે હાલમાં ઇરાન સાથેની મંત્રણા સારી રીતે ચાલી રહી છે અને જો મંત્રણા આ જ રીતે સારી ચાલે તો તેનું પરિણામ સારું આવી શકે છે. આમ જો નહીં થાય તો અમારી પાસે ઇરાન પર આક્રમણ કરવાનો વિકલ્પ તો ખુલ્લો જ છે.

આ બતાવે છે કે હાલમાં અમેરિકાના ઇરાન પરના આક્રમણને બ્રેક લાગી છે, તેના કારણે ક્રૂડ ઓઇલમાં આવેલો વધારો તરત જ ધોવાયો છે અને તે યુદ્ધવિરામની સંભાવનાએ ઘટવા લાગ્યુ છે. જો યુદ્ધવિરામ થાય તો તેના પ્રથમ પગલાં તરીકે હોર્મુઝ ખૂલ્લુ મૂકવામાં આવી શકે છે. આ સંજોગોમાં બજારમાં સપ્લાય ચેઇન નિયમિત થવાથી વધુને વધુ ક્રૂડ ઓઇલનો પુરવઠો બજારમાં ઠલવાઈ શકે છે. આ એક પરિબળે પણ ક્રૂડ ઓઇલમાં ઘટાડો કરવામાં મહત્વની ભૂમિકા ભજવી હોવાનું માનવામાં આવે છે.

બ્રેન્ટ ક્રૂડની સાથે-સાથે WTI ક્રૂડ પણ ઘટ્યુ હતુ અને તે 91 ડોલર પર ઊંચામાં ખૂલીને 90 ડોલરે પહોંચી ગયું છે. આમ અમેરિકા-ઇરાન વચ્ચેની શાંતિ મંત્રણામાં વધુ પ્રગતિ થાય તો ક્રૂડ ઓઇલના ભાવમાં હજી પણ ઘટાડો થઈ શકે છે. આમ ક્રૂડ ઓઇલના ભાવમાં વૃદ્ધિ અને ઘટાડો બંનેનો આધાર આ મંત્રણા પર રહેલો છે. કમસેકમ વિશ્વને એક યુદ્ધમાંથી તો મુક્તિ મળશે અને ખોરંભાયેલી સપ્લાય ચેઇન ફરી પાછી સક્રિય થશે.

નિષ્ણાતોનું કહેવું છે કે જો અમેરિકા-ઇરાન વચ્ચે છ મહિના પણ શાંતિ રહી તો ક્રૂડના ભાવ 80 ડોલરને આંબી જઈ શકે છે. તેની સાથે-સાથે સપ્લાય ચેઇન પણ વધુને વધુ પૂર્વવત્ સ્થિતિમાં આવી શકે છે અને વિશ્વ વૈશ્વિક શાંતિની દિશામાં આગળ વધી શકે છે.