જાન્યુઆરી 2027 સુધી ખાંડનો ઇથેનોલ માટે ઉપયોગ ન કરવા ઉદ્યોગની માગ

મુંબઇ: આસમાને ચઢતા ખાંડના કાબૂમાં રાખવા અને નવી સિઝનમાં ખાંડનો પુરવઠો જળવાઇ રહે તે માટે સાવચેતીપૂર્વક રણનીતિ બનાવવા ખાંડ ઉદ્યોગે કેન્દ્ર સરકારને ભલામણ કરી છે. બોમ્બે શુગર એસોસિએશને સરકારને પત્ર લખીને નવી સિઝનમાં આગામી જાન્યુઆરી મહિના સુધી શેરડી કે ખાંડનો પુરવઠો ઇથેનોલ માટે વાપરવાને બદલે ખાંડનાં ઉત્પાદન ઉપર ધ્યાન કેન્દ્રિત કરવાની માગણી કરી છે.

બોમ્બે સુગર એશોસિએશનનાં પ્રમુખ અશોક જૈને ખાદ્ય સચિવને પાઠવેલા પત્રમાં જણાવ્યું છે કે છેલ્લા ત્રણ વર્ષ દેશમાં ખાંડના ઉત્પાદન અંગે સિઝનની શરૂઆતમાં આપવામાં આવતા અંદાજો અને વાસ્તવિક ઉત્પાદન વચ્ચે મોટો તફાવત જોવા મળ્યો છે. જેના પરિણામે ખાંડના કારખાના બંધ થાય ત્યારબાદ માલની ખેંચ ઉભી થાય છે. તેથી સરકાર અંદાજીત આંકડાના આધારે ખાંડના આયાત, નિકાસ અને પુરવઠા અંગેના નિર્ણય ઉતાવળે અને આપમેળે લાવવાનું ટાળવું જોઇએ. હાલના સંજોગો જોતા સરકારે આગામી જાન્યુઆરી મહિના સુધી શેરડી કે ખાંડનો પુરવઠો ઇથેનોલ બનાવવામાં વાપરવાને બદલે માત્ર ખાંડનો પુરતો સ્ટોક ઉભો કરવા માટે વાપરવો જોઇએ. જાન્યુઆરી-2027 સુધીમાં ભારતમાં ખાંડના ઉત્પાદન અને માગનું સાચું ચિત્ર મળ્યા બાદ સરકાર ઇથેનોલ માટે ફાળવણી કરે તે યોગ્ય ગણાશે.

ભારતને સ્થાનિક વાર્ષિક વપરાશ માટે 295 લાખ ટન ખાંડની આવશ્યકતા રહે છે. આ ઉપરાંત ખાંડની સરળ ઉપલબ્ધિ માટે નવી સિઝનના પ્રારંભે 55 લાખ ટનથી 60 લાખ ટન જેટલો બફર સ્ટોક રાખવાની જરૂર પડે છે. જાન્યુઆરી-2027 સુધીમાં મિલો તરફથી મળેલા આંકડાનાં આધારે ખાંડનો રિકવરી રેટ કેટલો આવે છે અને દેશમાં શેરડીનું ઉત્પાદન કેટલું થયું છે તેની સચોટ ગણતરી કરી શકાશે. ત્યારબાદ સરકાર વધારાના ખાંડના સ્ટોકમાંથી કેટલો પુરવઠો ઇથેનોલ માટે વાપરવો તે નક્કી કરે તો બજારમાં ખાંડની ખેંચ ઉભી નહી થાય અને દેશવાસીઓને વ્યાજબી ભાવે ખાંડનો પુરવઠો મળી રહેશે.

આ સાથે જ એસોસિએશને જરૂર પડ્યે દિલ્હીમાં સરકારી પ્રતિનિધિઓ સાથે બેઠક યોજીને ખાંડના સ્ટોક, ઉત્પાદન અને પુરવઠાની જમીની હકીકતથી વાકેફ કરવાની તૈયારી પણ દેખાડી છે.

આ પણ વાંચો: SIPમાંથી અપેક્ષિત વળતર નથી મળતું? ફંડ બદલતા પહેલાં આ 5 બાબતો તપાસો