RTOના ધક્કા ઘટશે! ડ્રાઇવિંગ લાઇસન્સમાં નામ-સરનામું બદલવું થશે સરળ

ડ્રાઇવિંગ લાઇસન્સ સંબંધિત કામકાજમાં લોકોને પડતી મુશ્કેલી ઘટાડવા માટે કેન્દ્ર સરકાર નિયમોમાં મોટા ફેરફારની તૈયારી કરી રહી છે. પ્રસ્તાવિત ફેરફારમાં લાઇસન્સમાં નામ, સરનામું, મોબાઇલ નંબર અને ઈ-મેલ જેવી વિગતો અપડેટ કરવાની પ્રક્રિયા સરળ કરવાની સાથે વિવિધ સેવાઓ માટે એક જ અરજી ફોર્મ અને ભારતીયો-વિદેશીઓ માટે અલગ રંગના લાઇસન્સ જેવી જોગવાઈઓનો સમાવેશ થાય છે. જોકે, આ ફેરફારો હાલ ડ્રાફ્ટ પ્રસ્તાવના તબક્કામાં છે.

નામ-સરનામું બદલવા માટે ચાર્જ નહીં લેવાનો પ્રસ્તાવ

કેન્દ્ર સરકારના પ્રસ્તાવ મુજબ ડ્રાઇવિંગ લાઇસન્સમાં સરનામું, મોબાઇલ નંબર અને ઈ-મેલ અપડેટ કરવા માટે કોઈ ચાર્જ નહીં લેવાય. આધાર મારફતે ઓનલાઈન મળતી સેવાઓને પણ મફત કરવાની દરખાસ્ત કરવામાં આવી છે. લાઇસન્સમાં નામ અથવા સરનામું બદલવા જેવી અરજીઓ પર લાઇસન્સિંગ ઓથોરિટીએ 15 દિવસની અંદર નિર્ણય લેવાનો રહેશે. અરજી નકારવામાં આવે તો તેનું કારણ પણ જણાવવાનું રહેશે. વધુમાં, સરનામું બદલવાની અરજી પર 30 દિવસની અંદર નિર્ણય ન લેવાય તો તેને મંજૂર માનવાની જોગવાઈનો પણ પ્રસ્તાવ છે.

ઉંમર અને સરનામાના પુરાવાની પ્રક્રિયા બદલાશે

ઉંમર અને સરનામાની ખરાઈ માટે કાર્યકારી મેજિસ્ટ્રેટ અથવા નોટરી સમક્ષ સોગંદનામું આપવાની અનિવાર્યતા દૂર કરવાની દરખાસ્ત કરવામાં આવી છે. તેના બદલે આધાર કાર્ડ, પાસપોર્ટ, મતદાર ઓળખપત્ર, ઈ-રેશન કાર્ડ અને જન્મ પ્રમાણપત્ર સહિતના વિવિધ દસ્તાવેજોને ઉંમર અને રહેઠાણના પુરાવા તરીકે સ્વીકારવાની જોગવાઈનો પ્રસ્તાવ છે. ખોટા ઉંમર અને સરનામાના પુરાવાના દુરુપયોગને રોકવા માટે સોગંદનામું આપવા તેમજ જીવન વીમા પોલિસીને પુરાવા તરીકે સ્વીકારવામાં નહીં આવે તેવી પણ દરખાસ્ત કરવામાં આવી છે.

વિવિધ સેવાઓ માટે એક જ અરજી ફોર્મ

મંત્રાલયે ડ્રાઇવિંગ લાઇસન્સ રિન્યૂ કરાવવા, ડુપ્લિકેટ લાઇસન્સ મેળવવા, વાહનની નવી શ્રેણી ઉમેરવા અને વ્યક્તિગત માહિતી બદલવા જેવી સેવાઓ માટે એક જ અરજી ફોર્મનો પ્રસ્તાવ કર્યો છે. આ ઉપરાંત ડ્રાઇવિંગ લાઇસન્સ પર ચાલકનું બ્લડ ગ્રુપ, મોબાઇલ નંબર અને ઈમર્જન્સી સંપર્ક નંબર નોંધવાની પણ તૈયારી છે.

ભારતીયો અને વિદેશીઓ માટે અલગ રંગના લાઇસન્સ

પ્રસ્તાવિત ફેરફારોમાં ડ્રાઇવિંગ લાઇસન્સ પર ધારકની રાષ્ટ્રીયતાનો ઉલ્લેખ કરવાની પણ જોગવાઈ હોઈ શકે છે. આ માટે ભારતીય અને વિદેશી નાગરિકોને અલગ-અલગ રંગના ડ્રાઇવિંગ લાઇસન્સ આપવાની યોજના રજૂ કરવામાં આવી છે. તેના કારણે લાઇસન્સ જોઈને જ ધારકની રાષ્ટ્રીયતા ઓળખવી સરળ બની શકે છે.

હાલ નિયમો અંતિમ નથી

આ તમામ ફેરફારો હાલ કેન્દ્ર સરકારના પ્રસ્તાવિત ડ્રાફ્ટનો ભાગ છે. એટલે કે, તેમને અમલમાં આવેલા અંતિમ નિયમો તરીકે ગણવા યોગ્ય નથી. ડ્રાફ્ટનો મુખ્ય ઉદ્દેશ્ય ડ્રાઇવિંગ લાઇસન્સ સંબંધિત અરજીઓ અને દસ્તાવેજોની પ્રક્રિયાને સરળ બનાવવાનો છે.

આ પણ વાંચો : ગુજરાતમાં કૃષિ વેપારનું નવું સરનામું e-NAM! લાખો લોકો જોડાયા; ₹12,740 કરોડનું વેચાણ

આ પણ જુઓ:

Watch onYouTube