Driving Licenceમાં નામ-સરનામું બદલાવવું થશે મફત? ₹200ની ફી હટાવવાનો પ્રસ્તાવ

Driving Licence: ઘર બદલ્યા પછી ડ્રાઇવિંગ લાઇસન્સમાં નવું સરનામું નોંધાવવાનું હોય કે નામમાં સુધારો કરાવવાનો હોય—આવા કામ માટેની પ્રક્રિયા હવે સરળ અને ઓછી ખર્ચાળ બની શકે છે. કેન્દ્રના માર્ગ પરિવહન અને રાજમાર્ગ મંત્રાલયે ડ્રાઇવિંગ લાઇસન્સ સંબંધિત નિયમોમાં ફેરફારનો ડ્રાફ્ટ જાહેર કર્યો છે. તેમાં કેટલીક સેવાઓની ફી દૂર કરવા, ઓનલાઇન અરજીની વ્યવસ્થા સુધારવા અને અધિકારીઓ માટે નિર્ણયની સમયમર્યાદા નક્કી કરવાના પ્રસ્તાવો છે. જોકે, વાહનચાલકો માટે સૌથી જરૂરી વાત એ છે કે આ હજી પ્રસ્તાવ છે. ₹200ની ફી હાલથી જ નાબૂદ થઈ ગઈ છે એવું નથી. અંતિમ નિયમો જાહેર થયા બાદ જ સંબંધિત ફેરફારો અમલમાં આવશે.

કયા કામ માટે ફીમાં રાહત મળી શકે?

ડ્રાફ્ટ મુજબ લાઇસન્સધારકના નામ અથવા અન્ય નોંધાયેલી વિગતોમાં ફેરફાર માટેની ₹200ની નિર્ધારિત ફી દૂર કરવાનો પ્રસ્તાવ છે. સરનામું બદલવા, મોબાઇલ નંબર અથવા ઇમેઇલ અપડેટ કરવા માટે પણ ફી નહીં વસૂલવાની જોગવાઈ સૂચવાઈ છે. ઓનલાઇન આધાર ઓથેન્ટિકેશનથી મેળવાતી સેવાઓ માટે ફીમુક્તિનો પ્રસ્તાવ પણ સામેલ છે. ઘર બદલનારા પરિવારો, નોકરી માટે બીજા શહેરમાં જતા લોકો અને લાઇસન્સની વિગતો સુધારવા ઇચ્છતા નાગરિકો માટે આ ફેરફારો ઉપયોગી બની શકે છે. જોકે, તેને દરેક પ્રકારનું નવું ડ્રાઇવિંગ લાઇસન્સ મફત મળશે એવી જાહેરાત તરીકે સમજવું યોગ્ય નથી.

અરજી પર નિર્ણય માટે સમયમર્યાદા

ડ્રાફ્ટમાં લાઇસન્સની વિગતો બદલવા પોર્ટલ પર Form 2A મારફતે અરજી કરવાની વ્યવસ્થા સૂચવાઈ છે. અરજદારે સાચી વિગતોના માન્ય પુરાવા આપવાના રહેશે અને ઇ-સિગ્નેચર અથવા અન્ય સૂચિત પદ્ધતિથી ઓળખની ખરાઈ થઈ શકશે. અરજી મળ્યાના 15 દિવસમાં લાઇસન્સિંગ ઓથોરિટીએ ફેરફાર મંજૂર કરવાનો અથવા કારણ સાથે અરજી નકારવાની રહેશે. સરનામું બદલવાની અરજી માટે ખાસ જોગવાઈ છે: 30 દિવસમાં અરજી સ્વીકારવામાં કે નકારવામાં ન આવે તો તેને મંજૂર ગણવામાં આવશે. આ પ્રસ્તાવ અંતિમ સ્વરૂપ લે તો અરજી કર્યા પછી નિર્ણયની રાહ જોતા નાગરિકોને વધુ સ્પષ્ટતા મળી શકે છે.

ફીમાં રાહત સાથે સલામતીની કસોટી વધુ કડક

એક તરફ સેવાઓ સરળ કરવાનો પ્રસ્તાવ છે, તો બીજી તરફ સલામત ડ્રાઇવિંગ અંગેની સમજની કસોટી વધુ કડક કરવાની તૈયારી છે. ડ્રાફ્ટમાં સેફ ડ્રાઇવિંગ ટ્યુટોરિયલનો સમય ઓછામાં ઓછો 30 મિનિટ રાખવા અને સંબંધિત પરીક્ષામાં પાસ થવા જરૂરી ગુણ 60%થી વધારીને 75% કરવાનો પ્રસ્તાવ છે. ટ્યુટોરિયલ પૂર્ણ કરવાની સમયમર્યાદા 7 દિવસથી વધારીને 15 દિવસ કરવાની જોગવાઈ પણ સૂચવાઈ છે. આ ફેરફારને વાહન ચલાવવાના પ્રાયોગિક ટેસ્ટના પાસિંગ માપદંડ સાથે ભેળવવો નહીં.

હવે આગળ શું?

16 ઑક્ટોબર 2026ની G.S.R. 902(E) સૂચના હેઠળનો ડ્રાફ્ટ 21 ઑક્ટોબરે પ્રકાશિત થયો છે. જાહેર જનતાને ગેઝેટની નકલ ઉપલબ્ધ થયાની તારીખથી 30 દિવસ સુધી વાંધા અને સૂચનો મોકલવાની તક આપવામાં આવી છે. સરકાર આ પ્રતિભાવો વિચાર્યા પછી અંતિમ નિયમો જાહેર કરશે.

આ પણ વાંચો: Radhika Merchant Outfit: ₹5 લાખના Luxury ડ્રેસ સાથે Fitness બેન્ડે પણ ખેંચ્યું ધ્યાન

આ પણ જુઓ:

Watch onYouTube