Net Direct Tax Collection: સરકારની ચોખ્ખી ટેક્સ વસૂલાત 11.76% વધી ₹14.42 લાખ કરોડ, STTમાં 52%નો ઉછાળો

Direct Tax Collection: સરકારની પ્રત્યક્ષ કર વસૂલાતમાં વૃદ્ધિ જળવાઈ રહી છે. કોર્પોરેટ ટેક્સ અને સિક્યોરિટીઝ ટ્રાન્ઝેક્શન ટેક્સ (STT)ની મજબૂત વસૂલાત વચ્ચે 1 એપ્રિલથી 10 નવેમ્બર 2026 દરમિયાન ચોખ્ખી પ્રત્યક્ષ કર આવક ₹14.42 લાખ કરોડે પહોંચી છે. આ રકમ ગત નાણાકીય વર્ષના સમાન સમયગાળા કરતાં 11.76% વધુ છે. બીજી તરફ, કરદાતાઓને આપવામાં આવેલા રિફંડમાં પણ લગભગ 26%નો વધારો થયો છે.

આવકવેરા વિભાગના આંકડા મુજબ, ગત નાણાકીય વર્ષના સમાન સમયગાળામાં ચોખ્ખી પ્રત્યક્ષ કર વસૂલાત (Direct Tax Collection) ₹12.90 લાખ કરોડ હતી. રિફંડ ચૂકવ્યા બાદ સરકાર પાસે રહેતી કરની રકમને ચોખ્ખી વસૂલાત કહેવામાં આવે છે. રિફંડની બાદબાકી પહેલાંની કુલ ડાયરેક્ટ ગ્રોસ કલેક્શન, 14.02% વધીને ₹17.50 લાખ કરોડ થયું છે. ગત વર્ષના સમાન સમયગાળામાં આ વસૂલાત ₹15.35 લાખ કરોડ હતી.

કંપનીઓ પાસેથી મળતા ચોખ્ખા કોર્પોરેટ ટેક્સની વસૂલાતમાં નોંધપાત્ર વધારો થયો છે. તે ગત વર્ષના ₹5.36 લાખ કરોડથી વધીને ₹6.32 લાખ કરોડ થઈ છે. આ પ્રમાણે કોર્પોરેટ ટેક્સમાં લગભગ 17.84% વૃદ્ધિ નોંધાઈ છે. ચોખ્ખી નોન-કોર્પોરેટ ટેક્સ વસૂલાત ₹7.18 લાખ કરોડથી વધીને ₹7.56 લાખ કરોડ થઈ છે, જે લગભગ 5.30%નો વધારો દર્શાવે છે. આ શ્રેણીમાં વ્યક્તિઓ, હિન્દુ અવિભાજિત પરિવારો (HUF), ફર્મો અને અન્ય એકમો દ્વારા ચૂકવવામાં આવતા કરનો સમાવેશ થાય છે.

સિક્યોરિટીઝના વ્યવહારો પર લાગતા STTની વસૂલાતમાં પણ તીવ્ર વૃદ્ધિ થઈ છે. ગત વર્ષના સમાન સમયગાળામાં STT (Securities Transaction Tax)ની આવક ₹35,681.88 કરોડ હતી, જે ચાલુ વર્ષે લગભગ 51.56% વધીને ₹54,077.90 કરોડ થઈ છે. કર વસૂલાતની સાથે રિફંડની રકમ પણ વધી છે. 10 નવેમ્બર 2026 સુધીમાં કુલ પ્રત્યક્ષ કર રિફંડ ₹3.08 લાખ કરોડ રહ્યું છે. ગત નાણાકીય વર્ષના સમાન સમયગાળામાં ₹2.45 લાખ કરોડનું રિફંડ આપવામાં આવ્યું હતું. આમ, રિફંડમાં લગભગ 26%નો વધારો નોંધાયો છે.

સરકારે ચાલુ નાણાકીય વર્ષમાં પ્રત્યક્ષ કર મારફતે ₹26.97 લાખ કરોડ એકત્ર કરવાનો બજેટ લક્ષ્યાંક રાખ્યો છે. આ લક્ષ્ય FY26માં એકત્ર થયેલા ₹23.40 લાખ કરોડ કરતાં લગભગ 15% વધુ છે. 10 નવેમ્બર સુધીમાં થયેલી ₹14.42 લાખ કરોડની ચોખ્ખી વસૂલાત સાથે સરકારે વાર્ષિક બજેટ લક્ષ્યનો આશરે 53% હિસ્સો હાંસલ કરી લીધો છે.

આ પણ વાંચો: Credit Guarantee: નાના ઉદ્યોગસાહસિકો માટે રાહત! ક્રેડિટ ગેરંટી યોજના પાંચ વર્ષ લંબાઈ, ગેરંટી ફી પણ ઘટી

આ પણ જુઓ:

Watch onYouTube