વાવ-થરાદના સણાદરમાં બનાસ ડેરીના ફ્રેન્ચ ફ્રાઇઝ પ્લાન્ટનું વિસ્તરણ, PM મોદી કરશે ઈ-લોકાર્પણ

બનાસકાંઠાના વાવ-થરાદ જિલ્લાના દિયોદર તાલુકાના સણાદર ખાતે બનાસ ડેરીના ફ્રેન્ચ ફ્રાઇઝ પ્રોસેસિંગ પ્લાન્ટનું વિસ્તરણ પૂર્ણ કરવામાં આવ્યું છે. ₹51.65 કરોડના રોકાણથી થયેલા આ વિસ્તરણ બાદ પ્લાન્ટની ઉત્પાદન ક્ષમતા પ્રતિ કલાક 2 ટનથી વધીને 5 ટન થશે. વડાપ્રધાન નરેન્દ્ર મોદી 30 ઓક્ટોબરે આ વિસ્તૃત પ્લાન્ટનું ઈ-લોકાર્પણ કરશે. આ વિસ્તરણથી બટાકાના પ્રોસેસિંગને વેગ મળવાની સાથે સ્થાનિક બટાકા ઉત્પાદકો માટે બજારની નવી તકો ઊભી થવાની માહિતી આપવામાં આવી છે.

બટાકાના પ્રોસેસિંગને મળશે વેગ

બનાસકાંઠા બટાકાના ઉત્પાદનમાં અગ્રણી જિલ્લો છે. છેલ્લા 25 વર્ષમાં પ્રોસેસિંગ-ગ્રેડ બટાકાની ખેતી હેઠળનો વિસ્તાર આશરે 400 હેક્ટરથી વધીને 61,016 હેક્ટર થયો છે. વર્ષ 2024-25માં જિલ્લામાં આશરે 18.7 લાખ ટન બટાકાનું ઉત્પાદન થયું હતું અને પ્રતિ હેક્ટર ઉત્પાદકતા આશરે 30 ટન રહી હતી. ફળદ્રુપ જમીન, અનુકૂળ આબોહવા અને અદ્યતન ખેતી પદ્ધતિઓને કારણે આ વિસ્તાર ચિપ-ગ્રેડ અને ફ્રેન્ચ ફ્રાઇઝ-ગ્રેડ બટાકાના ઉત્પાદન માટે અનુકૂળ ગણાય છે. પ્રોસેસિંગ દરમિયાન નીકળતા જૈવિક કચરામાંથી બાયોગેસનું ઉત્પાદન કરવામાં આવે છે, જ્યારે બાકી રહેલા અવશેષનો ખેતીમાં પુનઃઉપયોગ થાય છે.

બિયારણથી ફ્રેન્ચ ફ્રાઇઝ સુધીની ‘સીડ-ટુ-ફ્રાય’ વ્યવસ્થા

બનાસ ડેરીએ વર્ષ 2019માં અમૂલ બ્રાન્ડ હેઠળ ફ્રેન્ચ ફ્રાઇઝ સેગમેન્ટમાં પ્રવેશ કર્યો હતો. ત્યારથી ડેરીએ ગુણવત્તાયુક્ત બિયારણ, બટાકાની ખેતી, ખરીદી અને પ્રોસેસિંગને જોડતી ‘સીડ-ટુ-ફ્રાય’ વ્યવસ્થા વિકસાવી છે. આ પ્રક્રિયા Central Potato Research Institute અને અન્ય સંસ્થાઓ પાસેથી મેળવેલા રોગમુક્ત Germplasmથી શરૂ થાય છે. ત્યારબાદ બનાસ ડેરીની Tissue Culture Laboratoryમાં તેનો વિકાસ કરવામાં આવે છે અને કાનપુરની Aeroponic Facilityમાં G0 Minitubers તૈયાર કરવામાં આવે છે. આ Minitubersને ખેતરમાં G3 સ્તર સુધી વિકસાવવામાં આવે છે, જેથી ખેડૂતોને પ્રમાણિત બિયારણ મળી શકે અને પ્રોસેસિંગ માટે યોગ્ય ગુણવત્તાના બટાકાનું ઉત્પાદન થઈ શકે. ખેડૂતોને બિયારણ આપતી વખતે જ બટાકાની ખરીદીનો ભાવ અગાઉથી નક્કી કરવામાં આવે છે. વર્ષ 2023-24માં બનાસ ડેરીએ બટાકાના ખેડૂતોને ભાવના તફાવત પેટે આશરે ₹1.83 કરોડ ચૂકવ્યા હતા. વર્ષ 2024-25 માટે બાયબેક ભાવ પ્રતિ યુનિટ ₹13 અને વર્ષ 2025-26 માટે પ્રતિ યુનિટ ₹14 હતો.

10,000 ટનની કોલ્ડ સ્ટોરેજ સુવિધા

બટાકાની વેલ્યુ ચેઇનને મજબૂત બનાવવા માટે બનાસ ડેરીએ વર્ષ 2024માં 10,000 ટનની ક્ષમતાવાળી કોલ્ડ સ્ટોરેજ ફેસિલિટી વિકસાવી હતી. આ સુવિધા બટાકાના સંગ્રહ અને સપ્લાય ચેઇનને મજબૂત બનાવવામાં મદદરૂપ છે. આ ઉપરાંત, નવેમ્બર 2025માં ભારતીય બીજ સહકારી સમિતિ લિમિટેડ (BBSSL) સાથે MoU કરીને દેશભરના ખેડૂતો સુધી પ્રમાણિત બિયારણ પહોંચાડવાની દિશામાં પણ પહેલ કરવામાં આવી હતી.

વધેલી ક્ષમતાથી ખેડૂતો માટે નવી બજાર તકો

વર્ષ 2025-26માં ભારતમાંથી આશરે 2.77 લાખ ટન મૂલ્યવર્ધિત બટાકા ઉત્પાદનોની નિકાસ થઈ હતી, જેનું મૂલ્ય આશરે ₹2,744.50 કરોડ હતું. સણાદર ખાતે ફ્રેન્ચ ફ્રાઇઝ પ્રોસેસિંગ પ્લાન્ટની ક્ષમતા વધવાથી બટાકાના મૂલ્યવર્ધનને વેગ મળવાની અપેક્ષા છે. ગુણવત્તાયુક્ત બિયારણ, ખેડૂતો પાસેથી સુવ્યવસ્થિત ખરીદી, કોલ્ડ સ્ટોરેજ અને વધેલી પ્રોસેસિંગ ક્ષમતાના સંકલનથી બનાસકાંઠાના બટાકા ઉત્પાદકો માટે બજારની નવી તકો ઊભી થશે.

આ પણ વાંચો : પ્રકૃતિ અને રોમાંચનો અનોખો સંગમ! એકતા નગરમાં ‘રેઇન ફોરેસ્ટ’નું PM મોદી કરશે લોકાર્પણ

આ પણ જુઓ:

Watch onYouTube