કેબ રેન્ટલના નિયમોમાં મોટા ફેરફારની તૈયારી, માત્ર 5 કારથી શરૂ કરી શકાશે બિઝનેસ, મુસાફરોને મળશે વધુ વિકલ્પો!

Cab Rental New Framework: દેશમાં કેબ રેન્ટલનો બિઝનેસ શરૂ કરવા માગતા લોકો માટે રાહતના સમાચાર સામે આવ્યા છે. અત્યાર સુધી કેબ રેન્ટલ બિઝનેસ માટે ઓછામાં ઓછી 50 કેબની જરૂરિયાત હતી, પરંતુ હવે માત્ર 5 કેબથી પણ આ વ્યવસાય શરૂ કરવાનો માર્ગ મોકળો થઈ શકે છે. કેન્દ્ર સરકારના માર્ગ પરિવહન અને ધોરીમાર્ગ મંત્રાલયે કેબ રેન્ટલ સેવાઓ માટે નવા નિયમોનું ફ્રેમવર્ક પ્રસ્તાવિત કર્યું છે. આ ફેરફારનો મુખ્ય હેતુ કેબ રેન્ટલ બિઝનેસમાં પ્રવેશ સરળ બનાવવાનો અને મુસાફરોને વધુ સુરક્ષિત સેવાઓ સાથે પસંદગીના વધુ વિકલ્પો ઉપલબ્ધ કરાવવાનો છે.

માત્ર 5 કેબથી શરૂ કરી શકાશે રેન્ટલ બિઝનેસ

નવા ફ્રેમવર્કમાં કેબ રેન્ટલ ઓપરેટરો માટે સૌથી મોટો ફેરફાર વાહનોની ન્યૂનતમ સંખ્યાને લઈને કરવામાં આવ્યો છે. હાલમાં જરૂરી 50 કેબની સંખ્યા ઘટાડીને માત્ર 5 કરવાનો પ્રસ્તાવ છે. જોકે, દરેક ઓપરેટિંગ સ્થળ પર ઓછામાં ઓછી બે કેબ ઉપલબ્ધ રાખવાની શરત રહેશે. ઉપરાંત, અગાઉ પાંચ પ્રવાસન શહેરોમાં શાખાઓ ખોલવાની જરૂરિયાતને પણ દૂર કરવાનો પ્રસ્તાવ મૂકવામાં આવ્યો છે. આ ફેરફારથી નાના અને નવા કેબ રેન્ટલ ઓપરેટરો માટે વ્યવસાય શરૂ કરવો સરળ બની શકે છે. ખાસ કરીને ઓછી સંખ્યામાં વાહનો ધરાવતા લોકો પણ આ ક્ષેત્રમાં પ્રવેશ મેળવી શકશે.

ડ્રાઇવર સાથે અથવા વગર ભાડે મળશે કેબ

નવા નિયમો હેઠળ કેબ રેન્ટલ કંપનીઓને ગ્રાહકો માટે બે પ્રકારની સેવાઓ ઉપલબ્ધ કરાવવાનો વિકલ્પ મળી શકે છે.

•ગ્રાહકો ડ્રાઇવર સાથે કેબ ભાડે લઈ શકશે.

•ગ્રાહકો ડ્રાઇવર વગર પણ કેબ ભાડે લઈ શકશે.

આ વ્યવસ્થાથી ગ્રાહકો પોતાની જરૂરિયાત અને પસંદગી પ્રમાણે કેબ રેન્ટલ સેવાનો ઉપયોગ કરી શકશે.

સમગ્ર રાજ્યમાં એક જ લાઇસન્સથી ચાલશે કામ

કેબ રેન્ટલ બિઝનેસ માટે લાઇસન્સ મેળવવાની પ્રક્રિયા પણ સરળ બનાવવાનો પ્રસ્તાવ છે. માર્ગ પરિવહન અને ધોરીમાર્ગ મંત્રાલયના જણાવ્યાનુસાર, મુખ્ય લાઇસન્સ અને અલગ-અલગ શાખાઓ માટેના લાઇસન્સની જગ્યાએ સમગ્ર રાજ્ય અથવા કેન્દ્રશાસિત પ્રદેશમાં માન્ય એક જ લાઇસન્સ આપવામાં આવશે. આ લાઇસન્સ માટે એક સમાન ફીની વ્યવસ્થા રાખવાનો પ્રસ્તાવ છે. નવા ફ્રેમવર્ક હેઠળ એરપોર્ટ, રેલવે સ્ટેશન અને બસ ટર્મિનલ જેવા સ્થળોને પણ મંજૂર કામગીરીના સ્થળોમાં સામેલ કરી શકાશે.

આનાથી કેબ ઓપરેટરોને અલગ-અલગ સ્થળોએ વ્યવસાય ચલાવવા માટેની લાઇસન્સ પ્રક્રિયામાં સરળતા મળી શકે છે.

લાઇસન્સ માટે 60 દિવસ અને મંજૂરી માટે 30 દિવસની જોગવાઈ

નવા ફ્રેમવર્કમાં સરકારી મંજૂરીની પ્રક્રિયાને સમયમર્યાદામાં પૂર્ણ કરવાનો પણ પ્રસ્તાવ છે. લાઇસન્સ જાહેર કરવાની અથવા તેનું નવીકરણ કરવાની પ્રક્રિયા 60 દિવસની અંદર પૂર્ણ કરવાની જોગવાઈ સૂચવવામાં આવી છે. આ ઉપરાંત, ઓપરેટર પોતાના વાહનોની સંખ્યામાં ફેરફાર કરવા અથવા કામગીરીનાં સ્થળો ઉમેરવા કે દૂર કરવા માગે તો તેના માટે 30 દિવસની ડીમ્ડ એપ્રુવલ વ્યવસ્થા લાગુ થઈ શકે છે. ડીમ્ડ એપ્રુવલ એટલે નિર્ધારિત સમયમર્યાદામાં નિર્ણય ન લેવાય ત્યારે નિયમોમાં નક્કી કરેલી શરતો અનુસાર મંજૂરી મળેલી માનવાની વ્યવસ્થા.

ડિજિટલ રેકોર્ડને પ્રોત્સાહન

કેન્દ્ર સરકારે કેબ રેન્ટલ વ્યવસાયમાં ડિજિટલ પ્રક્રિયાઓ વધારવાનો પણ પ્રસ્તાવ મૂક્યો છે. નવા ફ્રેમવર્ક હેઠળ ઈલેક્ટ્રોનિક વાહન રજિસ્ટર રાખવાની અને જરૂરી માહિતી આપમેળે મેળવવાની વ્યવસ્થા કરવામાં આવી શકે છે. આનાથી વાહનોની વિગતો જાળવવી, નિયમોનું પાલન કરવું અને લાઇસન્સ સંબંધિત પ્રક્રિયાઓ પૂર્ણ કરવી સરળ બનશે. સાથે જ ઓપરેટરોને ઓછું કાગળકામ કરવું પડશે.

મુસાફરોની સુરક્ષા માટે કેબમાં જરૂરી સુવિધાઓ

પ્રસ્તાવિત નિયમો અનુસાર કેબમાં લોકેશન ટ્રેકિંગ સિસ્ટમ અને ફર્સ્ટ એઇડ કિટ જેવી સુવિધાઓ હોવી જરૂરી રહેશે. આ ઉપરાંત, બાળકોની સલામતી માટે ચાઇલ્ડ રિસ્ટ્રેન્ટ સિસ્ટમનો વૈકલ્પિક ઉપયોગ કરવાની જોગવાઈ પણ કરવામાં આવી છે. કેબ રેન્ટલ ઓપરેટરોએ ગ્રાહકો માટે પોતાની વેબસાઇટ અને 24 કલાક કાર્યરત ફરિયાદ નિવારણ સુવિધા ઉપલબ્ધ કરાવવાની રહેશે. સાથે જ રસ્તામાં વાહન ખરાબ થાય અથવા કોઈ ટેક્નિકલ સમસ્યા ઊભી થાય તો ઇમરજન્સી રિપેરિંગ અને ટોઇંગ સેવાઓ પણ પૂરી પાડવાની રહેશે.

ડ્રાઇવરોનું પોલીસ વેરિફિકેશન ફરજિયાત

મુસાફરોની સુરક્ષા સુનિશ્ચિત કરવા માટે કેબ રેન્ટલ ઓપરેટરો દ્વારા નોકરીએ રાખવામાં આવતા ડ્રાઇવરોનું પોલીસ વેરિફિકેશન ફરજિયાત બનાવવાનો પ્રસ્તાવ છે. આ ઉપરાંત, ડ્રાઇવરોના કલ્યાણ અને સામાજિક સુરક્ષા માટે સામાજિક સુરક્ષા સંહિતા, 2020 હેઠળની જોગવાઈઓને ધ્યાનમાં લેવામાં આવશે. જો કોઈ કેબ ડ્રાઇવર અથવા ઓપરેટર ગંભીર ગુનામાં સંડોવાયેલો હોય તો સંબંધિત ઓપરેટરના લાઇસન્સની માન્યતા ઘટાડવાની જોગવાઈ પણ પ્રસ્તાવિત કરવામાં આવી છે.

નાની ભૂલો સુધારવાની તક મળશે

જો કોઈ ઓપરેટર દ્વારા નાની ખામી કે નિયમોના પાલનમાં ભૂલ થાય તો તરત જ લાઇસન્સ સસ્પેન્ડ અથવા રદ કરવાને બદલે તેને ભૂલ સુધારવા માટે સમય આપવામાં આવશે. આ ઉપરાંત, લાઇસન્સ સંબંધિત નિર્ણય સામે અપીલ કરવા માટે ઇલેક્ટ્રોનિક સુનાવણીની વ્યવસ્થા પણ ઉપલબ્ધ કરાવવાનો પ્રસ્તાવ છે. આ પ્રક્રિયાથી ઓપરેટરોને પોતાની રજૂઆત કરવાની તક મળશે અને લાઇસન્સ સંબંધિત વિવાદોના નિરાકરણમાં સરળતા આવી શકે છે.

નવા નિયમોથી ગ્રાહકો અને કેબ ઓપરેટરોને શું ફાયદો થશે?

પ્રસ્તાવિત ફ્રેમવર્ક અમલમાં આવશે તો કેબ રેન્ટલ ઉદ્યોગમાં નાના વ્યવસાયકારો માટે નવી તકો ઊભી થઈ શકે છે. ઓછી સંખ્યામાં વાહનો સાથે વ્યવસાય શરૂ કરવાની છૂટ મળવાથી આ ક્ષેત્રમાં નવા ઓપરેટરોનો પ્રવેશ સરળ બની શકે છે. બીજી તરફ, મુસાફરોને ડ્રાઇવર સાથે અથવા વગર કેબ ભાડે લેવાની સુવિધા, લોકેશન ટ્રેકિંગ, ફરિયાદ નિવારણ અને ઇમરજન્સી સહાય જેવી સેવાઓનો લાભ મળી શકે છે. જોકે, આ તમામ ફેરફારો હાલમાં પ્રસ્તાવિત ફ્રેમવર્કનો ભાગ છે. તેને અંતિમ સ્વરૂપ અપાયા બાદ જ નવા નિયમોની ચોક્કસ અમલવારી સ્પષ્ટ થશે.

આ પણ વાંચો: વિક્રમ સંવત 2082માં ગુજરાતની આ કંપનીઓએ વળતર આપવામાં સેન્સેક્સ-નિફ્ટીને પાછળ છોડ્યા

આ પણ જુઓ:

Watch onYouTube