SUV માર્કેટમાં બદલાયો ટ્રેન્ડ: હવે ડીઝલ નહીં, CNG બની પહેલી પસંદ

SUV buyers: ભારતમાં SUV ખરીદનારા ગ્રાહકોની પસંદગીમાં હવે ધીમે ધીમે ફેરફાર જોવા મળી રહ્યો છે. એક સમયે SUV ખરીદતી વખતે ડીઝલને પ્રાથમિકતા આપતા ગ્રાહકો હવે CNG મોડલ તરફ પણ વળી રહ્યા છે. તેનું મુખ્ય કારણ SUVની કિંમત અથવા માત્ર દેખાવ નહીં, પરંતુ તેને ચલાવવાનો ખર્ચ પણ ગ્રાહકો માટે મહત્વનો બની રહ્યો છે. ખાસ કરીને નાની અને કોમ્પેક્ટ SUV કેટેગરીમાં CNGની માંગ વધી રહી છે. ઓટો સેક્ટરના તાજેતરના આંકડા પણ આ બદલાતી પસંદગી તરફ સંકેત આપી રહ્યા છે.

SUV માર્કેટમાં CNGનો હિસ્સો વધ્યો

ઓટોમોબાઇલ કન્સલ્ટન્સી ફર્મ Jato Dynamicsના આંકડા મુજબ, ચાલુ નાણાકીય વર્ષની પ્રથમ છમાસિકમાં રજિસ્ટર થયેલી કુલ SUVમાંથી 15.3% CNG મોડલ હતી.તેની સરખામણીએ ડીઝલ SUVનો હિસ્સો 28%, જ્યારે ઇલેક્ટ્રિક SUVનો હિસ્સો 9.9% રહ્યો હતો. ખાસ વાત એ છે કે ગયા નાણાકીય વર્ષમાં SUV માર્કેટમાં CNGનો હિસ્સો 13.2% હતો. એટલે ટૂંકા ગાળામાં CNGની ભાગીદારીમાં વધારો થયો છે. પાંચ વર્ષ પહેલાં નાણાકીય વર્ષ 2023માં પણ CNGનો હિસ્સો લગભગ આ જ સ્તરે હતો. ત્યારબાદ Maruti Suzukiએ Brezzaનું ફેક્ટરી-ફિટેડ CNG મોડલ રજૂ કર્યું હતું અને ત્યાર પછી Grand Vitara S-CNG જેવા મોડલ પણ બજારમાં આવ્યા.

ડીઝલ SUVને CNGથી પડકાર

એક સમયે SUV ખરીદદારોમાં ડીઝલ એન્જિન ખૂબ લોકપ્રિય હતું. તેનું કારણ વધુ ટોર્ક અને લાંબા અંતરની મુસાફરીમાં સારો પરફોર્મન્સ હતું. પરંતુ હવે નાની અને કોમ્પેક્ટ SUV ખરીદનારા ગ્રાહકોનું ધ્યાન ફ્યુઅલ ખર્ચ અને દૈનિક રનિંગ કોસ્ટ તરફ પણ ગયું છે. નાણાકીય વર્ષ 2022માં SUV વેચાણમાં ડીઝલનો હિસ્સો 38.9% હતો. હવે CNG જેવા વિકલ્પોની ઉપલબ્ધતાથી આ સેગમેન્ટમાં સ્પર્ધા વધી રહી છે. Jato Dynamicsના પ્રેસિડેન્ટ રવિ ભાટિયાના જણાવ્યા અનુસાર, SUV ખરીદવાનો નિર્ણય હવે માત્ર લુક અને બોડી સ્ટાઇલના આધારે થતો નથી. ગ્રાહકો એ પણ જોઈ રહ્યા છે કે SUV ચલાવવાનો ખર્ચ તેમના બજેટને અનુકૂળ છે કે નહીં.

Brezza અને Exter બની CNGની ગ્રોથના મુખ્ય મોડલ

CNG SUVની વધતી માંગનો લાભ Maruti Suzuki અને Hyundai જેવી કંપનીઓને મળી રહ્યો છે. Maruti Suzukiના જણાવ્યા અનુસાર, ચાલુ નાણાકીય વર્ષની પ્રથમ છમાસિકમાં તેના CNG વાહનોના વેચાણમાં 44%નો વધારો થયો છે. કંપનીના એન્ટ્રી અને કોમ્પેક્ટ SUV સેગમેન્ટમાં કેટલાક મોડલ માટે CNGની માંગ કુલ માંગના 40% સુધી પહોંચી રહી છે.

Brezza અને નવી Victoris જેવા મોડલ આ માંગને વધારવામાં મદદ

બીજી તરફ Hyundaiની Exter પણ ફેક્ટરી-ફિટેડ CNG વિકલ્પ સાથે ઉપલબ્ધ છે. કંપની જાન્યુઆરીમાં Bayonને પણ પોતાની CNG રેન્જમાં સામેલ કરવાની તૈયારી કરી રહી છે. Hyundaiના જણાવ્યા અનુસાર, તેની કુલ CNG કારના વેચાણમાં SUVનો હિસ્સો એક-તૃતીયાંશથી વધુ છે. આ દર્શાવે છે કે CNG હવે માત્ર નાની હેચબેક કાર સુધી મર્યાદિત રહી નથી.

અમદાવાદ અને સુરતમાં પણ વધી રહી છે માંગ

CNG SUVની માંગ દેશના અનેક મોટા શહેરોમાં વધી રહી છે. તેમાં નવી દિલ્હી, પુણે, અમદાવાદ, મુંબઈ અને સુરત મુખ્ય બજારો તરીકે સામે આવ્યા છે. આ શહેરોમાં CNGનું નેટવર્ક અને રોજિંદા વાહન ચલાવતા ગ્રાહકોની જરૂરિયાત CNG SUV સેગમેન્ટને આગળ વધારવામાં મદદ કરી રહી છે.

મોટી SUVમાં ડીઝલનું પ્રભુત્વ હજુ યથાવત

નાની અને કોમ્પેક્ટ SUVમાં CNGની માંગ ઝડપથી વધી રહી હોવા છતાં, મોટી અને પ્રીમિયમ SUVમાં ડીઝલનું પ્રભુત્વ હજુ પણ મજબૂત છે. Hyundaiએ 2030 સુધીમાં પોતાની કુલ વેચાણમાં 50%થી વધુ હિસ્સો પર્યાવરણને અનુકૂળ પાવરટ્રેનવાળા વાહનોનો કરવાનો લક્ષ્યાંક રાખ્યો છે. તેમાં CNG, ઇલેક્ટ્રિક અને હાઇબ્રિડ વાહનોનો સમાવેશ થાય છે. આથી, SUV માર્કેટમાં ડીઝલની જગ્યાએ CNGનો વધારો ખાસ કરીને કોમ્પેક્ટ SUV સેગમેન્ટમાં વધુ સ્પષ્ટ જોવા મળી રહ્યો છે.

આ પણ વાંચો: સ્પામ કોલ કરનારાઓની હવે ખેર નહીં! TRAI એ કાપ્યા 1.24 લાખ કનેક્શન

આ પણ જુઓ :