RBI Alert: 1 જાન્યુઆરીથી જૂની ચેકબુક બંધ થશે? જાણો RBIએ શું કહ્યું?

નવા વર્ષથી તમારી જૂની ચેકબુક બેકાર થઈ જશે અને બેન્કમાંથી નવી ચેકબુક લેવી પડશે? સોશિયલ મીડિયા પર છેલ્લા કેટલાક દિવસોથી આવી માહિતી ઝડપથી વાયરલ થઈ રહી હતી. હવે RBIએ સ્પષ્ટતા કરી છે કે 1 જાન્યુઆરી 2027થી ચેકબુક સંબંધિત કોઈ નવો નિયમ લાગુ થવાનો નથી અને હાલની CTS ચેકબુકમાં પણ કોઈ ફેરફાર જાહેર કરવામાં આવ્યો નથી.

વાયરલ મેસેજમાં શું દાવો હતો?

સોશિયલ મીડિયા પર ફરતા મેસેજમાં દાવો કરવામાં આવ્યો હતો કે 31 ડિસેમ્બર 2026 બાદ હાલની CTS ચેકબુકનો ઉપયોગ નહીં કરી શકાય. સાથે જ એવો દાવો પણ હતો કે 1 જાન્યુઆરી 2027થી ગ્રાહકોને નવી સુરક્ષા સુવિધાવાળી ચેકબુક લેવી પડશે. RBIએ આ બંને દાવાને નકારી કાઢ્યા છે.

RBIએ શું સ્પષ્ટતા કરી?

RBIએ 7 નવેમ્બરે જાહેર કરેલી સ્પષ્ટતામાં જણાવ્યું કે ચેકબુકના નિયમોમાં આવી કોઈ નવી વ્યવસ્થા લાગુ કરવાની જાહેરાત કરવામાં આવી નથી. કેન્દ્રીય બેન્કે સોશિયલ મીડિયા પર ફેલાતી માહિતીને ખોટી અને ભ્રામક ગણાવી છે. એટલે હાલની CTS ચેકબુક ધરાવતા ગ્રાહકોને તેને બદલવાની કોઈ જરૂર નથી.

શું છે CTS?

Cheque Truncation System એટલે કે CTS ચેક ક્લિયર કરવાની ડિજિટલ પદ્ધતિ છે. આ વ્યવસ્થામાં મૂળ ચેકને એક બેન્કથી બીજી બેન્ક સુધી મોકલવાને બદલે તેની ડિજિટલ ઈમેજ અને જરૂરી માહિતીના આધારે ક્લિયરિંગ પ્રક્રિયા કરવામાં આવે છે. તેના કારણે ચેક ક્લિયર થવામાં લાગતો સમય ઓછો થાય છે અને બેન્કિંગ પ્રક્રિયા વધુ સરળ બને છે.

ગ્રાહકોએ શું કરવું?

RBIએ લોકોને બેન્કિંગ અને ચેક સંબંધિત નિયમોની માહિતી માટે માત્ર RBIના સત્તાવાર માધ્યમો પર વિશ્વાસ કરવાની સલાહ આપી છે. સોશિયલ મીડિયા અથવા WhatsApp પર મળતા મેસેજની ખાતરી કર્યા વગર તેને સાચો માનવો કે આગળ મોકલવો નહીં. હાલમાં જૂની CTS ચેકબુક બંધ કરવાની કે નવી ચેકબુક ફરજિયાત કરવાની કોઈ જાહેરાત કરવામાં આવી નથી.

આ પણ જુઓ

Watch onYouTube